ڪولمبو (ويب ڊيسڪ) ايشيا ڪپ جي سپر فور مرحلي ۾ پاڪستان ۽ سريلنڪا وچ ۾ اڄ ٿيندڙ اهم ميچ ۾ به برسات جي اڳڪٿي ڪئي وئي آهي. پاڪستان ۽ سريلنڪا وچ ۾ اڄ ڪولمبو ۾ اهم ميچ کيڏي ويندي، اڄوڪي ميچ سيمي فائنل جي صورت اختيار ڪري ويو آهي، ميچ کٽيندڙ ٽيم فائنل لاءِ ڪواليفاءِ ڪندي جنهن جو مقابلو ڀارت سان ٿيندو. ڪولمبو ۾ ٿيندڙ ميچ دوران وقفي وقفي سان برسات جو امڪان آهي، سريلنڪا جي موسميات کاتي برسات پوڻ جي اڳڪٿي ڪئي آهي. سريلنڪن موسميات کاتي پاڪستان جي ميچ دوران ٽي ڀيرا برسات جي اڳڪٿي ڪئي آهي، منجهند شام ۽ رات جي وقت ۾ وقفي وقفي سان برسات جو امڪان آهي. واضع رهي ته پاڪستان ۽ سريلنڪا جي ميچ پاڪستاني وقت موجب منجهند اڍائي وڳي شروع ٿيندي.
