اسلام آباد /راولپنڊي (م ڊ) سنڌ سميت سڄي ملڪ ۾ بچاءَ ۽ شهيدن جو ڏهاڙو اڄ جوش ۽ جذبي سان ملهايو پيووڃي. پاڪ فوج سان ٻڌي جي اظهار لاءِ ريليون ڪڍي تقريبون ڪوٺايون وينديون. چيئرمين جوائنٽ چيف آف اسٽاف ڪميٽي، سروسز چيف ۽ پاڪ بچاءَ جي ڏهاڙي تي شهيدن ۽ سندن وارثن کي زبردست خراج عقيدت پيش ڪيو آهي. آءِ ايس پي آر جو چوڻ آهي ته ڇهه سيپٽمبر 1965 جي جنگ ثابت ڪيو ته قوم پنهنجي سرحدن جي حفاظت لاءِ هر وقت تيار آهي. آءِ ايس پي آر موجب، ڇهه سيپٽمبر تي وطن عزيز جي هزارين پٽن پنهنجي جانين جو نذرانو ڏئي پاڪ سرزمين جي دفاع کي ناقابل تسخير بڻايو، اڄ پوري قوم سندن قربانين کي سلام پيش ڪري ٿي. پاڪ فوج جي ترجمان موجب، قوم جي حيثيت سان جانين جو نذران پيش ڪندڙ سمورن شهيدن جي قربانين جا قرضدار آهن. پاڪ فوج جي ترجمان جو وڌيڪ چوڻ هو ته پاڪستان جي هٿياربند فوج هر طرح جي اندرين ۽ ٻاهرين خطرن خلاف وطن جي دفاع لاءِ پرعزم آهي، پاڪستان کي نقصان پهچائڻ جي ڪنهن به ڪوشش جو ڀرپور جواب ڏنو ويندو.
